كنت باتكلم علي الجنة وهانعمل ايه فيها
انا عن نفسي بادعي اكون المصري الوحيد في الجنة، صحيح المصريين طالع ميتين ابوهم ويستاهلوا يدخلوا الجنة بس انا لو دخلت الجنة مش هابقي مبسوط والمصرين فيها
يعني المصريين في الجنة هايتفوا في الارض، ولو مافيش جزم(باستثناء بعض الناس اللي هاتتسيح وتتعمل جزم للكفار يلبسوها في النار عمري ماسمعت عن الجزم لسكان الجنة)فمابالك لو دوست علي تفة حد
المصريين ممكن ياكلوا كل الشجر ويحرجونا قدام المؤمنين الاجانب
المصريين هايرموا الزبالة عشان مايشتركوش في النظافة
ممكن واحد من المصريين يقمع الباقيين، والمصريين اكيد هايتخانقوا علي الحور العين
يانهار اسود المصريين هايبقوا فضيحة في الجنة
فادعوا معايا ان كلكوا تدخلوا النار وانا ادخل الجنة
************************************************************************
كنت باتفرج علي مسلسل انجليزي في ام بي سي اكشن فلاحظت حاجة غريبة قوي
كل الافلام والمسلسلات بيتصل واحد بصوت تخين وهو نفس الصوت زي كل الافلام، يطالب بالفيدية ودايما البوليس بيستنتجوا ان الصوت ده متزور الكترونيا وبيقبضوا علي واحد برئ يقعد يقول والله مانا والله مانا
ومافكروش ابدا ان اللي خطف هو نفس الفاعل في جميع مسلسلاتك وافلامك يا امريكا
وبكده الجريمة بتستمر رغم جهود البوليس
وطبعا هاتستمر الي ان يقرأ صانعي القرار الامريكي هذا البوست للاكتشاف
***********************************************************************
الكلاب ديه نجاسة وبتطرد الملايكة!
قالها كده
ففكرت، تخيلوا كل اللي سرقوا البلد عندهم كلاب حراسة معاهم دايما
مش عارفيين نغيرهم وكمان مش هايتحسبوا عشان دايما الملايكة اللي بتكتب الحسنات والسيئات بتبقي واقفة بعيد
بجد حاجة ذل، متظبطين دنيا واخرة ولاد التيييييييييييييييييييييييييييييت
***********************************************************************
السبت يوليو 26, 2008 5:13 am
