المكان أحد أحياء القاهرة
الزمان يوم من أيام صيف عام 2052
حفيدة في سن المراهقة (12سنة) تجلس مع جدتها (70سنة) ويدور بينهما هذا الحوار:
الحفيدة:تيتة ميرو ازيك ..بقالى زمان ما قعدتش معاكى
الجدة: وهو أنا عارفة أتلم عليكى خالص..دة أنا قاعدة زهقانة قوى ومش لاقية حاجة تسلينى
الحفيدة :وما بتفتحيش الدش لية يا تيتة
الجدة: التليفزيون بقي ممل خالص مافيهوش غير 9700محطة بس! وأنا كمان ما بعرفش أغير المحطات.
الحفيدة واية الحلاوة دى ؟ حلو البادى اللى انتى لابساة دة . بس دة موضة قديمة قوى يا تيتة!
الجدة: يا بنتى أنا ست دقة قديمة وبالبس زى ما جيلنا الصاعد اتعود وحسب التقاليد القديمة بتاعتنا
الحفيدة :ايوة بس مش حاسة انك مخنوقة وانتى لابساة؟
الجدة :ابدا هو دة اللبس المحتشم اللى المفروض الكل يلبسة ويحافظ علية .. فين أيام زمان لما كنا نلبس البادى اللى مبين البطن والظهر بس ,مع البنطلون السترتش الجلد .. كانت حاجة اخر روشنة
الحفيدة: ياه ياتيتة ..دة انتو كان ليكم تقاليد غريبة خالص!
الجدة : وهو انتى فاكرة ان ايامكم دى ايام؟ يابنتى أيامكم دى ما يعلم بيها الا ربنا .. فين أيام سنة 2002 هى الواحدة فينا كانت تستجرى تشرب سيجارة البانجو ولا تسحب لها سطر بودرة قدام أبوها؟ طب ده الدنيا كانت تتقلب ساعتها وما تتعدلش ..امال اية كان فية حاجة اسمها أخلاق
الحفيدة : معقول يا تيتة ؟للدرجة الفظيعة دى!!؟
الجدة :امال انتى فلكرة اية .. وبعدين كانت الست من دول ما تلبسش اللبس الخليع بتاع اليومين دول ..يعنى الجيبة كان ما يقلش طولها عن شبر وربع ..وكانوا الستات يلبسوا فوقيها بلوزة باستمرار .. مش زى دلوقتى ! حسبي الله ونعم الوكيل !
الحفيدة :يا خبر ..واية كمان يا تيتة
الجدة :حقول اية ولا اية يعنى خدي عندك مثلا ..زمان كنا نسمع الطرب الأصيل لمطربين حقيقيين زى مصطفي قمر وعمرو دياب وطبعا كانت سيدة الغناء "شاكيرا" وكانت الأغنية مدتها أكثر من دقيقتين متواصلين من الطرب الأصيل والموسيقي الهادية الراسية اللى تعمر النافوخ بصحيح كانوا مطربين روشين واخر طحن
الحفيدة وبعدين يا تيتة
الجدة : وبعدين كنا نسمع على حاجة اسمها اسطوانات ليزر ودى صحيح انقرضت بس كان ليها طعم عن دلوقتى , يا سلام لما كنا نحطها في الووكمان ونعلقها فى حزام البنطلون كدة ونمشى فى الشارع كدة , كانت ايام جميلة .. حسبي الله ونعم الوكيل !!
الحفيدة: حكاويكى ممتعة قوى يا تيتة .. ثانية واحدة بس لما اصحى سمسم صاحبي فى المدرسة لانة بايت معايا فى الاودة من امبارح ..اصل الانمسان الآلى بتاع الصحيان بايظ ولازم نصلحة النهاردة
الجدة :طيب يا حبيبتى روحى ....................
الجمعة مايو 16, 2008 5:12 pm
