بم إن كل حاجة اتغيرت....غيرنا قوم يا مصري

بم إن كل حاجة اتغيرت....غيرنا قوم يا مصري

نام يا مصرى مصر مش عايزة تناديك
ياللى فقر الدنيا أصبح لك شريك
ياللى كان دائك وفائك والكرامة وكبريائك
الحشيش والبانجو ساقك.كبريائك مات خلاص البركة فيك
نام يا مصرى مصر مش عايزة تناديك
ياللى دايما كنت رافع بالسلاح أيدك لفوق
بالبنادق والمدافع خليت العالم يفوق
النهاردة سهل جدا تحكمك حتة حشيش
الشيوخ فوق مالطة تدن والشباب مابيختشيش
رقصة بلدى ورقصة تانجو
مرة خمرة ومرة بانجو
واللى م الدوامة ينجو يربى دقنه ويعاديك
نام يا مصرى مصر مش عايزة تناديك
فصلوا دستور مقاسهم يلبسوه بس الكبار
وأنت تحت نعال مداسهم قلت أه زى الحمار
قلت أه ولا حد همك مين يدوس فوق وش مين
هما يقروا الفاتحة وأنت كل حرف تقول أمين
أنت عارف بس صامت
حتى بطنك لما صامت
كان حزامك فوقها قامط للزراير يشتكيك
نام يا مصرى مصر مش عايزة تناديك
مين بيفهم فى السياسة؟لا الافندى ولا المدام
المهم الماتش إمتى؟والنتيجة كام لكام؟
والعشا فين النهاردة وفى المسلسل عملوا إيه
ولعيب الكورة الفلانى ساب ناديه فى الدورى ليه؟
كله بيهلوس وهايص
وإنت يا أبن المصرى لايص
جوه مسرح العرايس
والخيوط رابطة فى إيديك
نام يا مصرى مصر مش عايزة تناديك
كنت لما تقول معارض ألف واحد كان يخاف
بعت صوتك فى المعارض وأستغطيت باللحاف
قول نعم.حط العلامة .وأوعى تقرا فى يوم كتاب
هما عايزينك نعامة دافنة راسها فى التراب
والطاووس جنبك يخطى
بصمجى.ويقول دا خطى
وإنت لما رضيت توطى
شوف بقى اللى ح يجرا فيك
نام يا مصرى مصر مش عايزة تناديك

طبعا وبم إن دمك أكيد هيتحرق لما تقرا الكلام ده..........بس يا ريت ما تدعيش عليا...أنا برضه مصرية

بجد جميله جدا بس مش كل شباب مصر زي مانتي وصفتيهم
مازال هناك شباب بيحب مصر جدا
ومش ليه في الحاجه اللي انتي ذكرتيها
ولا انتي ايه رايك

انا لما قريت القصيده وتمعنت ىفيها
اكتشفت انك بجد مبدعه
بس انتي كده تخطيطي الخطوط الحمراء
خدي بالك