تهييس شباب

كان فى واحد صاحبنا فى أولى إعدادى فى أول حصة إنجليش فى السنة دى
فا الماستر بيسمعلنا الحروف الإنجليش فا سأل واحد زميلنا حافظهم يا بنى ؟
قاله آه بس مش بالترتيت قاله طب قول رايح قايل
A B C D E M L O N H S R Y Z

واحد صحبى وإحنا فى تانية ثانوى فى حصة رياضة
فا الأستاذ كان بيسأله فا قانون كان فى التفاضل باين
صحبى راح قايله بيساوى ظا ÷ ظاظا
الأستاذ قاله ظاظا !! هو أنا بقولك نادى على أخوك الصغير

واحد صحبى كان بيغش فى الإمتحان فا المراقبة شافته فا خدت منه الورقة
فا بيقولها أنا معملتش حاجة قالتله معلش أصل أنا ظالمة
قالها ربنا على الظالم والمفترى وإبن الحرام

واحد صحبى كان لسه متعرف على واحدة معانا فى الكلية
راح باع الموبيل بتاعه وجاب موبيل أقل منه عشان يعرف يصرف عليها ويظبطها
تانى يوم لقاها ماشية مع واد شعره منعكش وتلاتة شبر فوق
وشبه العنكبوت ونفضلته ولا كأنها تعرفه

واحد صحبى تانى ده بقى مبيكلمش بنات خالص
جه فى يوم قالى أخيرا يا عم كلمت بنت فى التليفون
واحدة إتصلت بيا كانت عايزة محمد عبده وقولتلها النمرة غلط

واحد صحبى برضه مبيكلمش بنات كان راكب مع سواق تاكسى
فا قاله بالله عليك يا بنى ما تكلم بنات معاك فى الكلية
قاله والله العظيم من غير ما تحلفنى

واحد صحبى زمان كان بيقولنا أنا بشتم عادى قدام مامتى ولا بتقولى أى حاجة
قالنا أنا هخبط دلوقتى وهى هتفتح وأول ما تفتح قولولى أى حاجة وأنا هشتمكوا
المهم المعلم شتم من هنا وراحة مامته قايلاله أيه الألفاظ دى ومناولاه بالقلم

واحد صحبى وهو صغير كان بيقول لمامته ماما أنا عايز كابورية
قالتله أسمه هامبرجر يا حبيبى

كان أستاذ برضه فى وسط كلامه فى الشرح بيقول أنا أشك
راح واحد صحبى قاله إذا أنت دبوس
راح طارده بره الحصة

دكتور عندنا بيتكلم بطريقة غريبة وبيزعق فا أنا قولت لصحابى هو مش الدكتور ده بيتكلم
زى الراجل اللى فى فيلم عوكل اللى كان بيقول
يالااااااااااااااااا إدولوووووووووو سلااااااااااااااااح
ضحكوا بصوت عالى والدكتور خد باله قولتلهم أثبتوا بدل ما ترفد من الكلية

عندنا دكتور فى أول محاضرة ليه فى الترم بيسألنا
عايزين تاخدوا المادة دى بالإنجليزى ولا بالعربى
ناس بتقول عربى يا دكتور وناس بتقول إنجليزى يا دكتور
أنا قولتله إنجليزى يا مرسى
إفتكرت الحتة اللى فى مدرسة المشاغبين إنجليزى ده يا مرسى
الحمد لله إنه مسمعنيش مع إن كان صوتى عالى بس الجو كان دوشة

كان عندنا أبلة فى الثانوى وبما إنى كنت من الطلبة الملتزمين
فا قفشتنى مرة بتكلم وقالتلى قوم إسبقنى على الحمام وأنا جاية وراك
قولتلها أيه يا أبلة ميصحش قالتلى والله العظيم لتروح
المهم طلعت وقفت قدام باب الفصل حوالى 10 دقايق مجتش نزلت ألعب كورة تحت

كنت مرة فى القاهرة فى مدينة نصر تقريبا وكان فى ميكروباصات واقفة تنادى
عمالة تقول أخر الشارع أخر الشارع أخر الشارع
فا كان فى بنتين معديين قولتلهم هو فى أيه فى أخر الشارع
كنت بقول كده بهزار طبعا ههههههههههههه

كان عندنا أستاذ كيميا وإحنا فى المعمل بيقول دلوقتى هنعمل عمل
قولتله آه هندبح أرنب ونولع بخور ونلف حواليه
قال يعنى هتطلعلنا عفريب من المعمل
راح طاردنى بره وقالى أنزل ألعب فى الحوش والله ما هكتبك غياب
وتقريبا اليوم ده طرد أكتر من نص الفصل واحد ورا التانى زى اللى طالعين مهمة ولا مأمورية

كان عندنا أستاذ فيزيا والوحيد اللى فى المدينة هنا اللى كان بيشرح الفيزيا عربى وإنجليش
المهم أخر ما زهق مننا قالنا يخربيتكوا ده أنتوا أغبية واللى علمكوا ظلمكوا
والله العظيم الأستاذ ده من بعد دفعتنا ساب التدريس واشتغل سواق تاكسى
وبشوفه بالتاكسى الفيات بتاعه لحد النهارده

كفاية أوى كده ده الدنيا نورت والواحد هيس على الآخر
إن شاء الله لو التوبيك عجبكوا ممكن أثبته وأعمله حلقات


الحلقة التانية

أنا وصحبى كنا بنعمل شاى السكر كان هيوقع لحقناه إحنا الاتنين بالعافية
المهم كل واحد إعتمد على إن التانى مسكه ورحنا سايبين فى وقت واحد
راح واقع على الأرض

كنت راجع مرة السادات من القاهرة فى السوبر جيت وكان اخر ميعاد
فا ركبوا ناس زيادة فا واحد كان قاعد ورايا مخنوق من الوضع
قاله هات باكو لبان وألزقلك أتنين على القزاز


أتنين جيران خالى فا واحد منهم شتم التانى قاله طظ فيك لحد الصبح
فا جه يشتكى لخالى وقاله يرضيك يقولى طظ فيك لحد الصبح
خالى راح قال للتانى أنت بتقوله طظ فيك لحد الصبح ليه
ما كنت تسيبهاله مفتوحة يا أخى
أنت فاكره زعلان من طظ فيك هو زعلان إنها لحد الصبح بس

واحدة برضه كانت عايزة تشتغل خالى بعتتله رسالة عادية من موبايلها
تم تحويل عشرة جنيه بتاعت فودافون بس برقمها هى
وإتصلت بيه قالتله معلش حولتها غلط ممكن ترجعهالى
خالى قفش الحركة قالها والله أنا كان عليا خمسة جنية لفودافون
قالتله بس أنا حولتلك عشرة قالها
مانا هحط الخمسة التانية فى الجامع

الغفير اللى فى مزرعة جدى كنت بقوله أنت مش ناوى تتجوز بقى
أنت عندك كام سنة ؟ قالى 40 قولتله ولسه متجوزتش
قالى والله أنا قدامى واحدة ب5 عيال وواحدة ب3 عيال وبختار منهم
قالى أم 5 عيال دى تمام العيال تشتغل بس هياكلونى فا أم 3 معقولة
تفكير عملى بصراحة

كان برضه الغفير ده بيقولى أنا جبت موبايل إندزنيس
قولتله مفيش حاجة أسمها كده
قالى هو اللى باعهالى باعهالى بالخط وقالى إندزنيس
قولت يمكن نوع جديد ولا حاجة وريهالى كده
طلعت عدة نوكيا بخط بزنيس

وانا صغير كنت متعور فوق بوقى كده
فا حطيت لزقة طبية عليها
الناس كانوا فاكرنى قصدى اعمل شنب باللزقة الطبية
بقى كل اللى يشوفنى يضحك وانا مش فاهم هما بيضحكوا على ايه

واحد صحبى بورسعيدى كنا بنقوله بصراحة
أيه رأيك فى البورسعيدية ؟
قالنا البورسعيدية بيحبوا يخدموا بس مبيعرفوش يخدموا

واحد صحبى كان لسه متعين فى شغل جديد فا أتعرف على واحدة معاه فى الشغل
المهم قالتله تعالى عشان ماما عايزة تشوفك وتتعرف عليك
شوية وقالتله بابا كمان عايز يشوفك
شوية وقالتله ده خالى برضه جاى وعايز يتعرف عليك
المهم راح لقى أبو البنت إبتدى يدبسه فى جواز
وبيسأله أنت عندك شقة ؟
قاله لا مانا عامل جمعية وهقبضها فى شهر 7 وأجيب شقة
قاله طب أنت مجهز العفش ؟
قاله ماهو الفلوس اللى هتطلع من الجمعية بتاعت شهر 7
هشترى شقة والباقى هيكفى العفش
قاله طب عندك أى مشروع تانى أو أطيان أو رصيد فى البنك ؟
قاله ماهى الجمعية بتاعت شهر 7 دى لما أقبضها
هشترى الشقة والعفش واللى هيتبقى هفتح مشروع أو أشيل الفلوس فى البنك
أبو البنت ميل عليه كده وقاله هى الجمعية دى قد أيه ؟
قاله ألفين جنيه
الراجل أتصدم وسكت شوية كده وراح قايله
بقى أنا أبقى واحد مسافر بالقطر ومعايا فلوس يادوب على قد درجة تالتة
أروح أقول للكمسرى أقطعلى تذكرة درجة أولى
قاله مانا إن شاء الله لما أقبض الجمعية بتاعت شهر 7
هبقى أركب قطر لوحدى



الحلقة التالتة..سر يمكن



هو موقف شخصى حصلى وهنزله فى حلقة لوحده لأنه طويل
وأهو لحد ما أظبط الحلقة الرابعة إن شاء الله



كنت خارج رايح مشوار المهم ركبت مع سواق تاكسى
كاتب على دراعه بخط كبير أوى كلمة يمكن
قولتله هو أنت كاتب على دراعك يمكن ليه ؟
قالى يمكن حد يصدقنى
قولتله فى أيه ؟
قالى أسمع ياسيدى هحكليلك
أنا مرة كنت زهقان روحت واخد التاكسى بتاعى ده (على فكرة كان فيات 128)وطالع على بلجيكا
وبلجيكا دى فى أمريكا قولتله لأ بلجيكا دى تبع أوروبا ياباشا قالى مانا عارف إنها فى أوروبا بس هى تعتبر تبع أمريكا ماهو إحنا كلنا أصلا بتوع أمريكا
ههههههههههه بصراحة عنده حق قولتله اشطه تبقى بلجيكا فى أمريكا
المهم قبل بلجيكا ب18 كيلو كده البنزين خلص
يااااااه طب وعملت أيه ؟؟؟
روحت مطلع العجلة من شنطة العربية وراجع على مصر مش على مصر مصر يعنى
على السويس عشان متقولش بضحك عليك
قولتله لأ ازاى كمل كمل هههههههه
روحت جايب بنزين ومظبط نفسى وراجع ولما رجعت بقى أقول للناس
محدش مصدقنى ويقولوا يمكن روحت كاتب أنا كمان على دراعى يمكن
طبعا أنا الحمد لله كنت وصلت وكنت ماسك نفسى بالعافية ونزلت من التاكسى من هنا
وفتحت فى الضحك من هنا وكل ما أفتكر أموت من الضحك هههههههههههه
المصيبة إنه بيتكلم بجد ومتأثر أوى
اللى هو تبقى نفسك تصدقه بس مش قادر ههههههههههه




الحلقة الرابعة
أطفال الجيران



أطفال جيرانا الصغيرين
حسام حسن
إبراهيم حسن
أحمد حسن
منتخب مصر الوطنى
وفى واحد لسه جاى من كام شهر أسمه محمد حسن
معرفش بصراحة هو جاى من نادى أيه

كانوا بيحطوا بدرة عفاريت للعيال الصغيرة اللى معانا فى المنطقة
فا واحد كان جاى ومعاه بنته الصغيرة وقالى ينفع كده
إبن جاركوا يحط للبنت بودرة عفاريت يخليها مش على بعضها
بصراحة أنا كنت عايز أضحك من الكلمة بس مسكت نفسى وهديت الراجل

حسام الكبير من هواة الإتصال بالناس من الموبيل بتاعى
سواء تهبيل أى أرقام أو يدخل الكونتاكت ويتصل بأول رقم فى وشه
اضطريت احط اول اسم حد من أصحابى عشان تبقى جت فى حد مننا وعلينا

إبراهيم مرة كان جايب عجلة وجاى قولناله منين دى ؟ قال لقيتها
المهم لما ضغطنا عليه ووقعناه فى الكلام قالنا منين دى
خد العجلة من بنت صغيرة قالها هروح أشرب من بيتنا وأرجع
والكلام ده من الضهر وهو رجع البيت المغرب يعنى طول الوقت ده بيلف بيها
وفى الاخر كمان خدها ومشى

إبراهيم ده مبدأه فى الحياه الصدق يعنى مشاكل
حالف على نفسه ما يقول الحقيقة بيموت فى الكدب
والله عليه وهو بيخترع حاجات أغرب من الخيال
أو يتثبت بسؤال فى نص الكلام وبيخترعله أى رد بسرعة

كان فى واحد حاطط طقم أنتريه قدام بيته يا إما جديد وكان لسه منزله من العربية
يا إما حاطه ومستنى العربية تيجى تاخده.. ما علينا المهم
هما كانوا معديين كل الحكاية إنهم رموا عود كبريت عليه وكملوا مشيوا زى ما هما

أحمد الصغير ما شاء الله عليه وعلى أسئلته الفتاكة
كان بيصحينى من النوم الصبح بدرى عشان يسألنى أنت صاحى ولا نايم
وبما إنه صحانى ورديت عليه يقولى قوم عشان تلعب معايا بقى
والكلام ده بيبقى غالبا الساعة 7 الصبح أو 8 بالكتير أوى
فانا بلعب معاه لعبة حلوة أوى بطلعه بره الأوضة وأقفل على نفسى وأكمل نوم

أحمد برضه ألدغ فى حرف أول مرة أشوفه فى حياتى
بيقول الره زين
دايما يقول لأخوه لو غلست عليا هقول لبابا لما يجى أخليه يزوقك
يروقك يعنى

أحمد برضه وبرضه وبرضه
قطعلى سلك النت ولما سألته بتقطعه ليه قالى أصل أنا مش عارف أعدى
السلك محطوط جنب الحيطة وكمان تحت السجادة
طب والنبى هيعدى من الحيطة مثلا

كنت خارج وقالولى شغلنا فيلم نتفرج عليه لحد ما ترجع ومش هنعمل حاجة
للأسف مهنش عليا أكسفهم بس نبهت عليهم محدش يلعب فى حاجة
خرجت ورجعت دخلت لقيت البيت ولا حس ولا خبر قولت بس تبقى مصيبة
لأن لو كان كله تمام كانوا ممكن يفضلوا قاعدين هنا أسبوع
لقيت الكمبيوتر مقفول وكان قلبى حاسس حطيت الفيشة لقيت المشترك مقفول
أتكى على الزرار أفتحه البيت كله يضلم والكمبيوتر يشتغل
أقفل زرار المشترك يطفى والبيت كله ينور
يعنى من الاخر يا أقعد على الكمبيوتر يا أقعد فى الضلمة
المهم عايز أعرف عملوا أيه روحت لقيتهم كلهم عاملين نايمين ومش بعادة يعنى يناموا بدرى
قولت ماشى فى السحور بقى عشان كنا فى رمضان
المهم ثبت حسام بكلمتين أنت الكبير ومبتكدبش وبتاع وقولى حصل أيه
قالى بصراحة بصراحة أنا كنت بحط إيدى أوقف المروحة اللى جوه الكمبيوتر أشوف هيحصل أيه
الله على البراءة

بذمتكوا شوفتوا براءة وهدوء أكتر من كده
أنا بقول كفاية كده لحسن أنا شكلى طولت فى الحلقة دى
وإدعولى أرتاح شوية من العيال دى قبل ما يحصلى حاجة

يا ايهاب فكك مننا ومن مواضيعك اللى تموت دى

منك لله يا حاتم انك عملت المنتدي ده وجبت فيه واحد زي ايهاب