الرئيسيةس .و .جبحـثالتسجيلدخول

شاطر | 
 

 تهيؤات .. مجرد تهيؤات

اذهب الى الأسفل 
كاتب الموضوعرسالة
E L S A K R
مشرف المنتدي الرياضي
مشرف المنتدي الرياضي
avatar

عدد الرسائل : 677
العمر : 30
الموقع : ww.mohamedhassan.org
تاريخ التسجيل : 06/05/2008

مُساهمةموضوع: تهيؤات .. مجرد تهيؤات   السبت مايو 24, 2008 1:24 pm

بدأت عندى التهيؤات فى مباراة المصرى والمحلة فى بورسعيد اول مباراة لحسام حسن كمدير فنى ولازم يكسب والتجربة تنجح من وجهة نظر اتحاد الكرة ولجنة الحكام وكمان عشان الحاج سيد ميزعلش لان المصرى مهدد بالهبوط

الحكم يحتسب ضربة جزاء ظالمة على غزل المحلة .. لا لا دا اكيد بيتهيألى المهم المصرى سجل منها الهدف الاول

الله .. فاول مفيهوش ريحة الفاول على لاعب غزل المحلة وطرد كمان ويسجل منها المصرى الهدف الثانى المهم المصرى كسب ومبروك لحسام وللحاج سيد

المصرى بيلاعب المقاولين برضو بيتهيألى ان حسام نازل الملعب وشوية وهيدى الحكم على وشه لانه طرد لاعب من المصرى بطريق الخطأ .. الناس كلها بتهدى حسام ربنا يستر وحسام يهدى وانت يعنى يا حكم لازم تنرفزه .. متعرفش ده مين ..

يا اخى استحمل وابقى طلع غلك انت وجمال فى جوزيه لما تحكمله

المهم بيتهيألى برضو ان الملعب اتملى جمهور وامن ومدربين وحسام نزل الملعب وابراهيم وعلاء نبيل ومدربين المقاولين ودنيا بحالها فى الملعب المهم حسام اهو خارج بس راح نحية علاء نبيل وقاله حاجة

علاء متنرفز .. يا ترى حسام قاله ايه ؟ حسام بيقول ان علاء بيشتم لاعبيه وبيشتم بورسعيد .. وطبعاً حسام لازم ياخد حق بورسعيد ولاعبيه

المهم الماتش خلص

وجينا لماتش الزمالك والمصرى فيه حاجات غريبة بتحصل فى الملعب .. مش عارف عبد المنصف ايه اللى حصله واللاعبين مجهدين من مشاركة افريقيا..

المهم حسام مش عاجبه احدى قرارات الحكم .. الله ايه ده ؟ حسام شاط المكريفون اللى جنب الخط .. لا لا اكيد بيتهيألى

المهم المصرى كسب

فى ماتش تانى اتهيألى ان ياسر عبد الرؤوف لغى احسن جول دخل فى الدورى لاحمد سلامة مهاجم الترسانة بس اللعبة مفيهاش حاجة .. يمكن يكون بيتهيألى .. اكيد بيتهيألى

ماتش تانى حكم بيلغى جون للاتصالات مع ان اللاعب ملمسش حارس مرمى الحدود بس اكيد الحكم صح وانا لسه بيتهيألى..

ماتش الاهلى والبلدية الماتش قرب يخلص ولاعب البلدية طلع فى كورة عرضية ولعب الكورة وكأنه بيعملها اعداد سريع فى ماتش كرة طائرة .. الحكم محسبش حاجة

بصراحة مش عايز اظلم الحكم يمكن القانون اتغير ودخل فيها بعض قوانين الكرة الطائرة ... نتأكد الاول قبل ما نظلم حد لان موضوع التهيؤات ده كتر معايا جداً ولازم اركز شوية

المهم الماتش خلص والاهلى كسب الدورى

ماتش الالومنيوم وانبى .. الحكم فوت 3 ضربات جزاء للالومنيوم .. بصراحة انا مع الحكم الالومنيوم فريق رخم ميستهلش ضربات جزاء تتحسبله .. مشوار وقصة وشحططة عشان الناس تلعب ماتش.. اقولكم كل اربع ضربات جزاء نحسبله واحدة عشان يبقى فيه تكافؤ فرص .

وبعدين الاتحاد مهدد بالهبوط وماتشه الجاى مع الاهلى الحاج محمد لازم يكلم الناس فى الاهلى عشان العلاقات الجميلة اللى بين الفريقين

عموماً الاهلى حسم البطولة ومن نفسه هيشرك فريق ما يعلم به الا ربنا ومتخفش يا حاج محمد

وبالفعل جوزيه عملها من نفسه ولما لقى النتيجة بتكبر قال ينزل 3 كوماندوز يلحقوا الدنيا قبل ما تخرب المهم الاتحاد كسب

الماتش اللى بعده الاتحاد والجيش .. والاتحاد محتاج يكسب برضو .. والجيش نازل شادد حيله وجاب جون كمان بس الاتحاد اتعادل .. وطبعا بين الشوطين الجمهور زعلان جداً

بصراحة ليهم حق اذا كان طلعت يوسف ابن اسكندرية مش " متعاطف " ابداً.. المهم الاتحاد خلص الماتش كسبان ومحدش يسألنى ازاى

ماتش الزمالك والمقاولين متعادلين والمقاولين محتاج يكسب وفعلا رمضان رجب جاب جون سليم .. الله فيه ايه ؟ الحكم لغى الجون عشان حامل الراية مشاورله .. بس الجون سليم .. اااااااااااااااااه .. اكيد بيتهيألى الحمد لله انى افتكرت قبل ما اظلم التحكيم

الزمالك والاتصالات الزمالك ماسك الماتش وهيكسب مستريح وفعلاً جايب جون والشوط الاول خلص .. احنا بين الشوطين ..

وبعدين طارق يحي ابن الزمالك وعقيل بيه هيزعل لو الاتصالات نزل .. وفى علاقات بين عقيل بيه وممدوح بيه .. ولازم يحصل شوية " تعاطف " المهم حصل والاتصالات فاز والحمد لله بس جمال حمزة زعلنى مش عايز يبدى اى "تعاطف" وجاب جونين اخر جمال

الاسبوع الاخير من الدورى

الجيش نازل بتقله على الالومنيوم .. برافو الجيش هو ده اللعب النظيف مالناش دعوة مين ينزل ومين يفضل خصوصا ان الالومنيوم مش من اسكندرية .

الاسماعيلى محتاج يكسب عشان المركز التانى والزمالك كمان يمكن المقاولين يعملها ويكسب

الزمالك جاب جون وكسبان والاسماعيلى بيلعب بكل جدية وسمير عاشور قايم بالواجب فى ماتش الترسانة والاتصالات

الحال اتقلب فى الشوط التانى .. بتروجيت جاب 3 اجوان وبعد الزمالك تماماً عن المنافسة ..بس الاسماعيلى ولا همه وبرضو بيلعب بجدية

الله ايه اللى بيحصل ده المذيع الداخلى بتاع استاد المقاولين هيقول حاجة فى الميكروفون انا مش شايف تغيير على الخط .. يمكن هيعزى الناس فى الكابتن عبده صالح

ايه ده دا بيعلن نتيجة مباراة الزمالك وبتروجيت للاعبى الاسماعيلى عشان يبدوا شوية" تعاطف " .. لأ وايه .. جمهور المقاولين بينده على فضل فى الملعب وبيقوله اهدى يا فضل اهدى .. اكيد بيتهيألى

عموما سمير عثمان قال لخالد كامل مراقب المباراة على حاجة .. وفعلاً خالد كامل قام بكل عنف وقال للمذيع الداخلى وجمهور المقاولين قالهم " يا وحشين متعملوش كده تانى "

المقاولين جاب الجون الاول .. غريبة دفاع الاسماعيلى اتفتح على الاخر .. الجون التانى للمقاولين ..

كورة عالية مدافع الاسماعيلى سابها تمر ووطى عشان متجيش فى راسه لاعب المقاولين حصلها ولاعب الاسماعيلى كعبله فى منطفة الجزاء ... اكيد بلنتى . الحكم حسبها ضربة حرة غير مباشرة ليه معرفش ؟

المهم لاعيبة الاسماعيلى بتنط فى الهواء ليه مش عارف والمقاولين جاب الجون التالت وفضل جاب جون والماتش خلص 3/1 والمقاولين بقى وكله تمام وحاجة زى الفل والالومنيوم الوحش نزل وارتحنا من مشواره الطويل ووجع قلب الصعيد واهو كفاية عليهم بترول اسيوط .. رضى قوى .. كفاية على الصعيد فرقة واحدة يعنى هما كانوا من مصر .. دا احنا بنخليهم يشتركوا معانا جدعنة ..

وانا اوعدكم .. هعالج نفسى من كل التهيؤات دى
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://www.mohamedhassan.org
 
تهيؤات .. مجرد تهيؤات
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
هندسه زراعيه عين شمس  :: القسم الرياضي :: الكره المصريه :: اخبار المنتخب المصري-
انتقل الى: